hilitehead

Салхи хөдөлгөөгүй үүл мэт охинд

Сансарын эрхэс зай тавин угтдаг

Сархад сөгнөөгүй жүнз мэт бүсгүйд

Сарны туяа гэрэл цацран тусдаг

Шуурганд налаагүй зэгс мэт охинд

Шувуудын жиргээ аяс болон очдог

Шугуйд төөрөөгүй янзага мэт бүсгүйд

Шөнийн одод нар болон буудаг

Хадан доорхи булаг мэт охинд

Хагдны өвс цэцэг болон ургадаг

Халуунд хагараагүй жимс мэт бүсгүйд

Хараацайн жигүүр сэрүү татан ирдэг

Зөгий суугаагүй цэцэг мэт охинд

Зүрхний дурлал жаргал амтлан буудаг

Зүү хөндөөгүй торго мэт бүсгүйд

Зүүдний мөрөөдөл хайр мэтгэн ирдэг

Базарын Мөнхдэлгэр